Lev 2 | NdeIBE | STEP | “Nxa umuntu angaletha umnikelo wamabele kuJehova; umnikelo wakhe uzakuba ngowefulawa ecolekileyo. Uzayithela amafutha ayihlanganise lempepha

Leviticus 2

1 “Nxa umuntu angaletha umnikelo wamabele kuJehova; umnikelo wakhe uzakuba ngowefulawa ecolekileyo. Uzayithela amafutha ayihlanganise lempepha 2 abeseyisa emadodaneni ka-Aroni, abaphristi. Umphristi uzacupha ifulawa ecolekileyo egcwala isandla ayihlanganise lamafutha, ndawonye lempepha abesetshisa njengesikhumbuzo e-alithareni, umnikelo owenziwa ngomlilo, olephunga elimnandi kuJehova. 3 Umnikelo wonke oseleyo owamabele ngoka-Aroni lamadodana akhe: uyingxenye engcwele kakhulu eminikelweni eyenzelwa uJehova ngomlilo.

4 “Nxa ungaletha umnikelo wamabele obhakwe eziko, kumele wenziwe ngefulawa ecolekileyo: amakhekhe abhakwe kungela mvubelo ahlanganiswa lamafutha kumbe amakhekhana ayizicecedu enziwe kungela mkhukhumezo asegcotshwa ngamafutha. 5 Uma umnikelo wakho wamabele uhlanganiselwe emganwini wensimbi kumele ulungiswe ngefulawa ecolekileyo ehlanganiswe lamafutha njalo ingela mvubelo. 6 Uvuthuze ubusuthela amafutha kuwo; ngumnikelo wamabele. 7 Nxa umnikelo wakho wamabele ubhakelwe epaneni, kuzamele wenziwe ngefulawa ecolekileyo lamafutha.

8 Letha umnikelo wamabele olungiswe ngalezi izinto kuJehova: ziqhubele kumphristi ozazisa e-alithareni. 9 Uzakhupha ingxenye eyisikhumbuzo emnikelweni wamabele abeseyitshisela e-alithareni njengomnikelo owenziwa ngomlilo olephunga elimnandi kuJehova. 10 Okuseleyo emnikelweni wamabele ngokuka-Aroni lamadodana akhe: Yingxenye engcwele kakhulu yomnikelo owenziwa kuJehova ngomlilo.

11 “ ‘Wonke umnikelo wamabele owuletha kuJehova kumele ulungiswe ungelamvubelo ngoba kakumelanga utshise imvubelo kumbe uluju emnikelweni owenzelwa uJehova ngomlilo.

12 Ungakuletha kuJehova njengomnikelo wokuchinsa izithelo zakuqala, kodwa kakumelanga ukuthi zinikelwe e-alithareni njengephunga elimnandi. 13 Tshwayani yonke iminikelo yamabele. Lingakhohlwa itshwayi lesivumelwano loNkulunkulu wenu eminikelweni yenu yamabele: fakani itshwayi eminikelweni yenu yonke.

14 “ ‘Nxa lingaletha umnikelo wamabele wezithelo zakuqala kuJehova, nikelani ngezikhwebu zamabele amatsha agigwe ekhanzingwe emlilweni. 15 Thelani amafutha lihlanganise lempepha: ngumnikelo wamabele.

16 Umphristi uzatshisa ingxenye eyisikhumbuzo emabeleni agigiweyo, kanye lamafutha ndawonye lempepha yonke njengomnikelo owenzelwa uJehova ngomlilo.